Brat masovnog ubice sa Cetinja: Niti mu groba znam, niti želim da znam

Boško Borilović, brat masovnog ubice sa Cetinja Vuka Borilovića, obratio se redakciji RTV Cetinje, kojoj je poslao pismo, uz molbu da bude objavljeno.

Pismo koje objavljuje RTV Cetinje prenosimo u cijelosti.

“Moja bi mu ruka sudila”

– Ovim putem želim da se obratim i izjavim saučešće porodicama i komšijama nastradalih, a ni sam ne znam kako. To su bili sve dobri i pošteni ljudi i znam da ni jedna moja riječ ne može ublažiti tugu i patnju za njihovim najmilijima. Žao mi je što nismo ja i moja porodica na mjestu njihovih najvoljenijih, da ne nose ovu muku i patnju.

Čitav život sam se borio za neki životni mir i sreću svih, ali mi ih više nemamo, niti ćemo ih više ikada imati, ni oni što izgubiše svoje najmilije koji su stradali ni krivi ni dužni od našeg nesretnika sa kojim sam se podigao.

Da mi je jedna dlaka na glavi u životu promislila da je za takvo zlodjelo rođen moja bi mu ruka sudila.

Nema riječi opravdanja i utjehe

Niti mu groba znam, niti želim da znam, jer za zlodjelo koje je napravio nema nijedne riječi opravdanja i utjehe.

Samo ne želim da iko doživi sudbinu njihovih porodica i moje, koja je sada beznačajna i uništena – napisao je Boško Borilović u pismu.

Podsjetimo, Vuk Borilović ubio je deset svojih komšija iz lovačkog karabina, a njih šest ranio. I sam je ubijen nakon krvavog pira, ali još uvijek nije utvrđeno da li je neutralisan policijskim metkom ili je to učinio njegov komšija Nenad Kaluđerović, za kog se smatra da je zaustavio masakr na Cetinju.

Brat masovnog ubice sa Cetinja: Niti mu groba znam, niti želim da znam
Brat masovnog ubice sa Cetinja: Niti mu groba znam, niti želim da znam

izvor : avaz.ba